شاعری عباس ممتاز

شاعری عباس ممتاز

کہیں پہ منطق کہیں دلائل ضرور ہوں گے

رہ جنوں میں سوال حائل ضرور ہوں گے

………..

کہیں پہ منطق کہیں دلائل ضرور ہوں گے

رہ جنوں میں سوال حائل ضرور ہوں گے

تھکن کے عالم میں کون بستر کو چھوڑتا ہے

وہ جا رہا ہے تو کچھ مسائل ضرور ہوں گے

تم اپنی ضد پر ڈٹے ہوئے ہو تو پھر یقیں ہے

تمہارے دامن میں کچھ دلائل ضرور ہوں گے

ابھی تو عمر رواں کی پہلی بہار میں ہیں

ابھی تو خوشبو کی اور مائل ضرور ہوں گے

تمہارا لہجہ تمہارے لفظوں سے مختلف ہے

تمہارے لہجے سے لوگ گھائل ضرور ہوں گے

………..

 شاعری عباس ممتاز 

جدائی کے ستم ڈھانے سے پہلے

پلٹ آؤ بکھر جانے سے پہلے

خوشی تھی رنگ تھے رعنائیاں تھیں

تمہارے شہر میں آنے سے پہلے

ابھی بھی وقت ہے تم لوٹ آؤ

مرے دل سے اتر جانے سے پہلے

ہمیں رنگوں کی یوں پہچان کب تھی

تمہارے رو بہ رو آنے سے پہلے

مجھے بھی زعم تھا غزلوں پہ اپنی

تری آنکھوں میں کھو جانے سے پہلے

کہاں تھے کیا تھے شاید کچھ نہیں تھے

تری نظروں میں ہم آنے سے پہلے

……….

زندگی کا کوئی بھی اشارہ نہیں

کوئی جگنو نہیں کوئی تارا نہیں

جیت کی دھن مجھے کس طرف لے گئی

ہارنے کے سوا کوئی چارہ نہیں

پہلے جس کے لیے دل دھڑکتا رہا

وہ کبھی تھا مگر اب ہمارا نہیں

میرے چاروں طرف لوگ ہی لوگ ہیں

کوئی اپنا نہیں کوئی پیارا نہیں

عباس ممتاز

اب جو پیروں پہ ہم کھڑے ہوئے ہیں

ایک دنیا سے ہم لڑے ہوئے ہیں

دیکھ ہم کو کہانیاں نہ سنا

ہم اسی شہر میں بڑے ہوئے ہیں

خود کو برباد کر لیا ہم نے

اپنی ضد پر مگر اڑے ہوئے ہیں

کوئی تو ہم کو تھامنے آئے

کوئی دیکھے کہ ہم کھڑے ہوئے ہیں